قصيدة عربية بدوية (يا خاطري)

ياسامعي تكفا تهيّض خاطري هات القلم واكتب جميل الحانها
أهدّ واقنص مثل طير الكاسري حلو المعاني وانتقي قيفانها
لقلتها مثل الجواهر ناثري من سمعها يطرب على ميزانها
أسمر على الشيلات ويا السامري نفسي تبيّح باللحون اشجانها
قالوا علامك يالمشقّى ساهري قلت المحبة تشتعل نيرانها
حبٍ تمكن في نواحي ضامري من غشمرية ربنا اللي زانها
فيها الحسن سبحان ربي باهري منطوقها مثل العسل بلسانها
ماله شبيهٍ بالزمان الحاضري ولا وصيفٍ في جميع ازمانها
فايق جماله للصبايا قاهري اللولو يفرق بالوصايف دانها
جمال نفسه والجمال الظاهري جملة عبير الكون من ريحانها

للشاعرعبداللطيف سعدالعلي الفضلي.

الليل عتمه والمساكن حزينه عليك ياللي يهتوي القلب طرياك
أموت هايم والمشاعر دفينه ياللي منى قلبي على الدوم لقياك
أهوى الذي يامهجتي تهتوينه واكره واعادي اللي من الناس عاداك
ترى المشاعر يامنايا سجينه سجينةٍ تبغي من الناس شرواك
أهوى النوايف واتجاهل طمينه وانولها لوهي على روس الافلاك
أصيد من صيد البراري سمينه مايمنعن عنها قويّات الاشواك
لو تطلبين الروح عندك رهينه تطيب نفسي بارك الله مسعاك
ماشفت مثلك سلوتي يافتينه يازين منطوقك ويازين مرباك
للشاعرعبداللطيف سعدالعلي الفضلي